Osun rerun election: INEC don confam Gboyega Oyetola of APC as govnor-elect


Osun state govnor-elect Gboyega Oyetola and current govnor Rauf Aregbesola

Di Independent National Electoral Commission (INEC) don announce say na Gboyega Oyetola of di All Progressives Congress (APC), na im win di Osun state govnorship election.

*Osun rerun election: ”We no go gree for di result sake of say na wayo election” -PDP

Oyetola defeat Senator Ademola Adeleke, candidate for di People’s Democratic Party (PDP) wit 482 votes afta im score 255,505 votes over Adeleke 255,023 votes afta dem do rerun election for Thursday.
Oga for Osun state PDP don already reject any kain result wey INEC go bring come. Hon. Soji Adagunodo don tok say di Osun rerun govnorship election na attack on democracy and di biggest tiff-tiff wey don happun for di south west state for Nigeria on Thursday.
Kola Ologbondinyan, wey be national tok tok pesin for PDP, for Thursday morning tok say make dem cancel di election unto say na electoral wayo.
Na for Twitter im cari put dis informate.INEC bin declare say di election wey dem do for Saturday, 22 September dey inconclusive afta di returning officer Professor Adeola Afuwape announce say PDP get 254, 698 votes while di candidate of di APC party get 254, 345 votes.
INEC say di rerun dey important well-well sake of say di vote gap between PDP and APC (353 votes) dey less than di number of registered voters wey be 3,498 for di seven polling units wia dem cancel election because of disturbance or technical palava.
INEC come fix Thursday 27 September wey dem go do rerun elections for seven polling units inside four local goment for Osogbo, Orolu, Ife South and Ife North local goment.


Please enter your comment!
Please enter your name here