Independence Day celebration: Air Force oga don order investigation of di military plane crash wey kill one officer


Nigeria Chief of Air of Staff, Air Marshal Sadique Abubakar, don give order make dem sharpely investigate di military air crash wey happun for Abuja.

NAF tok-tok pesin, Air Commodore Ibikunle Daramola, confam say COAS don order investigation.

Im say “di Chief of Air Staff don give order make dem investigate wetin cause di military jet to crash.”

Nigerian Air Force bin don announce before, say dia aircraft dey do practice for Abuja ahead of di Independence Day celebrations.

Pipo wey see di accident as e happun tell BBC say na around 11.30 am for Katampe district of Abuja di crash happun.

Na for mountain di jet bin tanda afta e crash and pipo gada for di site.

Sunday Emmanuel tell us says air force jets don dey rehearse for di area throughout di week and on Friday practise two jets jam diasef small.

Military jet accident

Emmanuel tok say three officers use parachute comot for di plane as e dey fall for ground but one of di officer parachute fit don spoil as e no work.

Anoda pesin, Michael Jacob tell BBC say wen pipo reach di site of di crash, dem see say one of di jet don catch fire and e dey smell as smoke dey comot from am.

Jacob tok say im no see di bodi of any of di officers but anoda pesin wey no gree make BBC mention im name say dem see di bodi of di officer wey im parachute don spoil for bush.

As e be so, authorities don cari di bodi of di officer wey die como.

Military jet accident

Plenti pipo bin show for di mountain to see di jet wey crash wit dia two korokoro eye.

Some dey even comot for di site wit parts of di jet wey don burn.


Please enter your comment!
Please enter your name here